Быел татарча диктантны Татарстаннан тыш Россиянең 41 төбәгендә һәм 22 чит илдә язарлар дип ниятләнә. Бу хакта оештыручылар – Бөтендөнья татар яшьләре форумы, Бөтендөнья татар конгрессы, Яшьләр эшләре буенча министрлык, Казан федераль университеты, Филология һәм мәдәниятара багланышлар институты тараткан хәбәрдә әйтелә.
Акциянең максаты – татар телен белү дәрәҗәсен арттыру, диелә. Диктантны язуда теләгән һәркем катнаша ала. Диктант нәтиҗәләре рәсми сайтта бер айдан да соңга калмыйча билгеле булачак.
Диктантны кәгазьдә яки турыдан туры сайтта клавиатура ярдәмендә язып була. Татарча клавиатура булган һәр девайс аша кереп, диктант текстын җыю мөмкинлеге бар. Моның өчен сайтта «катнашучы» буларак теркәлү узарга кирәк. Билгеле көнне шәхси кабинетка кереп, текстны тыңлап, диктант яза аласыз. Диктантны гадәти рәвештә язарга теләсәгез, язу мәйданчыкларына килә аласыз. Мәйданчыкны табу өчен сайттагы картаны ачасыз һәм үзегезгә уңайлы булган ноктаны эзлисез. Диктантның көне, вакыты картада (табылган мәйданчык янында) языла, ди оештыручылар.
Әлеге акциянең оештыручысы итеп билгеләнгән кешегә diktant.tatar сайтында 5 октябрьгә кадәр теркәлергә кирәк.
Диктант яздыру ниятләнгән төбәкләр: Татарстан, Башкортстан, Бурятия, Саха (Якутия), Коми, Удмуртия, Чувашия, Мордовия, Марий Эл, Дагыстан республикалары, ХМАО-Югра, Мәскәү, Петербург, Байкал аръягы, Красноярск, Краснодар, Ставрополь, Пермь крайлары, Әстерхан өлкәсе, Владимир, Волгоград, Иваново, Иркутск, Калининград, Кемерово, Киров, Курган, Мәскәү, Түбән Новгород, Омск, Оренбург, Пенза, Ростов, Самара, Саратов, Сахалин, Свердловск, Томск, Төмән, Ульяновск, Чиләбе, Ярославль өлкәләре.
Диктант уздыру нияләнгән чит илләр: Австралия, Австрия, Азәрбәйҗан, Бөек Британия, Болгария, Венгрия, Германия, Италия, Казахстан, Кипр, Канада, Кытай, Кыргызстан, Латвия, Яңа Зеландия, Литва, Берләшкән Гарәп әмирлекләре, АКШ, Төркия, Швеция, Үзбәкстан, Эстония.
Оештыручылар мәгълүматлары буенча, катнашучылар динамикасы түбәндәгечә:
2016 елда «Татарча диктант» беренче тапкыр уза, Россиянең 9 төбәге, 3 чит ил катнаша, барлыгы 600 кеше.
2017 – Россинең 20 төбәгеннән, 9 чит илдән 4000 кеше.
2018 – Россиянең 35 төбәгеннән, 18 чит илдән 10000 кеше.
2019 – Россиянең 47 төбәгеннән, 22 чит илдән 85 мең кеше.
2020 – төбәкләр, илләр турында мәгълүмат юк, барылгы 378 875 кеше.
2021 – Россиянең 74 төбәгеннән һәм 34 чит илдән 1 миллион кеше.
2022 – Россиянең 74 төбәгеннән һәм 31 чит илдән 1 106 827 кеше.