(28 октябрь, 2015 ел) Казанда Газовая 2 урамында урнашкан биш катлы йорт диварына татар шагыйре Муса Җәлилнең зур портретын ясаганнар. Сурәтнең авторы – Мәскәү рәссамнары, дип хәбәр ителә “Вконтакте” челтәре группаларының берсендә.

«Мәскәүдән бу кадәр ерак китеп, Казанда беренче тапкыр ясыйбыз. Татарстанда Мәскәү көннәре кысаларында танылган шагыйрь Муса Җәлил сурәте төшерелгән әлеге граффитины шәһәр халкына Мәскәү мэры бүләк итә. Портер Газовая 2, 5, 1 корпус адресы буенча урнашачак».

Татарстанда Мәскәү көннәренә багышланган мәдәни программа бу елның 28 октяберендә старт алачак. Ул Мәскәү музыка театрының “Зимняя роза” спектакле белән башланачак. Тамаша Качалов театрында узачак.

Икенче көнгә, 29 октябрьдә “Хәзинә” милли сынлы сәнгать галереясында “Мастер и ученик” исемле күргәзмә ачылачак. Биредә С. Андрияки акварель мәктәбе үз эшләрен тәкъдим итәчәк.

Мәскәү көннәре 30 октябрьдә Муса Җәлил исемендәге опера һәм балет театрында төгәлләнәчәк. Анда Мәскәү артистлары катнашында гала-концерт узачак.

Мәгълүмат  http://tatar-congress.org сайтыннан алынды