(14 ноябрь, 2015 ел) Татарстанның фин-угыр халыклары фестивален үткәрү кысаларында “Чишмә” Дуслык Йортында “Татарстан Республикасында фин-угыр халыклары мәдәнияты үсеше сораулары” дип аталган темага түгәрәк өстәл узды.
Әлеге чарада ТР фин-угыр халыкларының милли-мәдәни автономияләре җитәкчеләре катнашты: марилар – Олег Третьяков, мордвалар – Сергей Новиков, удмуртлар – Валентин Романов, шулай ук җирле общиналар җитәзкчеләре, мәдәният министрлыгы, Татарстан халыклары Ассамблеясы һәм Дуслык Йорты хемәткәрләре.
Очрашу барышында ТР фин-угыр халыклары хәрәкәте үсешенә караган сораулар, телне саклау һәм өйрәнү проблемалары каралды, шулай ук киләчәккә эшләнәсе эшләр турында сөйләштеләр.
Яр Чаллының җирле удмуртлар оешмасы җитәкчесе Валентина Билык фин-угыр халыклары фестивален ел саен үткәрергә һәм аның форматын үзгәртергә тәкъдим итте.
“Быел фестиваль фольклор юнәлешендә үтсә, алдагы енлларда аның форматын һәм масштабын үзгәртергә мөмкин. Мисалга, ул заманча эстрада-җыр юнәлешендә үтә ала”, — дип чыгыш ясады Валентина Билык.
ТР мордва милли-мәдәни автономия рәисе Сергей Новиков исә тел һәм мәдәниятны үстерү буенча күп кенә чараларның нәтиҗәсез булуын искәртте.
Түгәрәк өстәл эшенең нәтиҗәсе – резолюция булды. Аның нигезендә Яр Чаллыда фин-угыр халыкларының мәдәниятын саклау һәм үстерү эшендә общиналарның җәмгыяви, мәдәни һәм фәнни көчләрен берләштерүче фин-угыр мәдәнияты үзәген төзү тәкъдиме ясалды.
Татарстан халыклары Дуслык Йорты мәгълүмат үзәге