(29 декабрь 2020) Татарстанның Халыклар дуслыгы йортында «Татарстан — Яңа гасыр» республика иҗтимагый хәрәкәте утырышы узды. Утырышны ТР Дәүләт Советы Рәисе, Татарстан халыклары Ассамблеясе Советы Рәисе Фәрит Мөхәммәтшин үткәрде. (ФОТО)
Фәрит Мөхәммәтшин хәрәкәт эшчәнлегенә нәтиҗә ясаудан тыш, җыелучыларны Туган телләр һәм халыклар бердәмлеге елы чараларында актив катнашырга чакырды:
«Киләсе ел Татарстанда Туган телләр һәм халыклар бердәмлеге елы дип игълан ителде. Билгеле булганча, тиешле оештыру комитеты төзелде … ТНВ республикада яшәүче барлык милләт вәкилләренең телләрен һәм мәдәниятләрен саклап калуда һәм үстерүдә активлык күрсәтергә тиеш».
Шулай ук Фәрит Мөхәммәтшин искә төшергәнчә, 2021 елның апрелендә Бөтенроссия халык санын алу узачак:
«Бу — гражданлык бурычы гына түгел, ә үз халкыңның һәм Ватаныңның язмышы өчен җаваплылык күрсәтү дә, икәнен халыкка җиткерергә кирәк».
Чара ахырында хөкүмәт бүләкләре тапшыру тантанасы булды. Татарстан Республикасы Мәдәният министрлыгының Мактау грамоталары белән Татарстанның Халыклар дуслыгы йорты хезмәткәрләре бүләкләнде: костюмнар бүлеге мөдире Резедә Рәхмәтуллина, чаралар оештыру бүлеге җитәкчесе Анжелика Әмирханова, мәгълүмати үзәк җитәкчесе Рөстәм Ханнанов, музей-күргәзмә эшчәнлеге бүлеге мөдире Рамил Азимов һәм баш инженер Илназ Закиров.
Дуслык йортының мәгълүмат үзәге