22 декабрьдә «Мир» кинотеатрында ел дәвамында республикада узган «Панорама» Татарстан халыклары кинофестиваленең ябылу тантанасы була.
Кинофестиваль Татарстан Республикасында Туган телләр һәм халыклар бердәмлеге елына багышланган иде, ә аның ачылышы 21 февральдә Халыкара туган телләр көнендә Татарстанның Халыклар дуслыгы йортында узды. Ел дәвамында тамашачылар Россиянең төрле төбәкләреннән һәм илләрдән килгән милли кинематограф әсәрләре белән таныша алды.
Фестивальнең ябылу тантанасында Татарстан халыклары Ассамблеясы һәм Дуслык Йорты коллективлары һәм солистлары чыгыш ясаячак: «Мирас» инструменталь ансамбле, «Хумо» үзбәк бию ансамбле солисткасы Юлия Ким. Программада шулай ук гөсләче Наталья Эллер, варганчы Илдар Варган катнашачак.
Кичә «бер миллионга бер» (реж. М. Мозаффар) фильмын күрсәтү белән дәвам иттереләчәк.
Тантана 22 декабрьдә 18:00 сәгатьтә башлана.
Дуслык йортының мәгълүмат үзәге