22-25 октябрьдә Мордовиянең башкаласы Саранск шәһәрендә мордва халкының VI съезды булып узды. Анда Россиянең 40 тан артык төбәгеннән 350 делегат, 300 дән артык кунак катнашты.
Әлеге съездның төп үзенчәлеге шунда — пленар һәм секция утырышлар Мордовия башкаласында гына түгел, ә административ районнарда уздырылды. Аның кысаларында тантаналы рәвештә милли мәдәни үзәк, шулай ук кәсепчелек үзәге, беренче бөтендөнья сугышы геройларына һәйкәл, С.Д.Эрьзи исемендәге сәнгать музее ачылды. 
Әлеге форумда делегатлар телне, мәдәниятне, милли үзаңны үстерү , Россиянең төрле төбәкләрендә яшәүче мордва халкының үзара хезмәттәшлеген ныгыту мәсьәләләре турында сөйләштеләр. Форум эшендә Татарстан Республикасының мордва милли-мәдәни автономиясе , Татарстан Республикасы Президенты каршындагы эчке эшләр сәясәте Департаменты вәкилләре дә катнашты. Ике республика халкы арасында дуслык мөнәсәбәтләрен ныгытуга керткән өлеше өчен Мордовия Республикасы башлыгы В.Д.Волков Татарстан Республикасының мордва милли-мәдәни автономиясе җитәкчесенә Рәхмәт хаты тапшырды.
Информацион үзәк