(19 гыйнвар) Кичә Түбән Кама шәһәренең халыклар Дуслыгы Йортында «Вербиченька» украин җәмгыяте Украинадан килгән качаклар өчен Н.В. Гогольнең “Раштуа төне” дигән спектаклен күрсәтте. Спектакль шәһәрнең 15-нче санлы мәктәп укучылары тарафыннан әзерләнгән иде. Спектакль барышының беренче минутларыннан ук яшь артистлар тамашачыларны Раштуаның кабатланмас сихри дөньясына алып кереп киттеләр.
Соңыннан «Вербиченька» украин җәмгыяте җитәкчесе урынбасары Людмила Валентиновна Найденко мәктәп укучыларына Мактау хаты тапшырды, Украинадан килгән качакларның бер генә кичкә булса да борчу-мәшәкатьләреннән аралап, кәефләрен күтәрергә ярдәм иткәннәре өчен балаларга олы рәхмәтен җиткерде.
