(28 гыйнвар) Татарстан халыклары Ассамблеясы һәм Дуслык Йорты күпчалымлы мәдәни җәмгыятьтә телләрне саклап калу һәм тагын да үстерү проблемаларына багышланган фәнни докладлар җыентыгын нәшер итте. (эксклюзив)Әлеге җыентыкка 2014 елның 28 ноябрендә Татарстан халыкларының Дуслык Йортында узган төбәкара фәнни-гамәли конференциядә укылган фәнни докладлар тупланган.
“Түгәрәк өстәл” темалары бүлегендә Татарстан халыклары Дуслык Йорты директоры, Татарстан Республикасы Дәүләт Советы депутаты Ирек Шәриповның “Дәүләт милли сәясәтен гамәлгә ашыруда дәүләт органнары һәм Татарстан Республикасы милли мәдәни автономияләре арасында үзара хезмәттәшлегенә” багышланган зур күләмле доклады урын алган.
Секция темаларында татар, башкорт, чуаш, мари, удмурт, мордва телләре проблемаларына багышланган фәнни докладлар басылган. Җыентык мәктәп балалары, студентлар, укытучылар һәм, шулай ук, милли белем бирү учрежденияләре өчен әсбап буларак кулланылырга мөмкин.