(21 сентябрь, 2015 ел) Татарстан халыклары Дуслык йортында Лидия Токсубаеваның «Русское народное искусство Казанского Поволжья XIX-XX веков» китабын тәкъдим иттеләр (ФОТО)
Әлеге китап өч Идел буе республикасы рус халкы сәнгатенең тарихи-этнографик тикшеренүе турында сөйли: Татарстан, Чуашия һәм Марий Эл.
Автор XIX-XX гасыр аралыгындагы архитектура, уеп ясау, чигү, туку, челтәр үрүнең үсеш алу һәм формалашу процессларын күзәтә.
Шулай ук китапта төбәкнең иҗтимагый үсешенә йогынты ясаган халык сәнгатенең роле һәм әһәмияте күрсәтелә. Хезмәтнең нигезенә автор тарафыннан күп еллар буе үткәрелгән экспедицион тикшеренү материаллары салынган.
Токсубаева Лидия Сергей кызы — Татарстан һәм тулаем Идел буе фәнни җәмгыятенең билгеле фигурасы. Озак еллар хезмәт иткән Казан университетында ул этнография фәннең үсешенә әһәмиятле өлешен керткән.
Китапны тәкъдим итү кичәсендә Татарстан халыклары ассамблеясе Советының Башкарма комитеты җитәкчесе Николай Владимиров, Татарстан халыклары Дуслык Йорты директоры, ТР Дәүләт Советы депутаты Ирек Шәрипов, Татарстан халыклары ассамблеясе Советы рәисе урынбасары, Казанның Рус коммерцияле булмаган оешмалар җитәкчесе Ирина Александровская, Ассамблея һәм Дуслык Йорты, фәнни берләшмә вәкилләре, Казан югары уку йортлары студентлары катнаштылар.
Татарстан халыклары Дуслык Йорты мәгълүмат үзәге