(10 гыйнвар, 2016 ел) Алабуга шәһәренең Покров чиркәве каршындагы “Лествица” Якшәмбе мәктәбе укучылары өчен Раштуа бәйрәме үтте.
Бәйрәм башында балалар Раштуага багышланган һәм дини эчтәлектәге җырлар башкардылар. Бәйрәмнең икенче өлешендә Якшәмбе мәктәбенең кечкенәләр төркемендә укучылар әти-әниләре өчен “Теремкәй” әкиятен куйды.
Кыш Бабай һәм Кар кызы балаларга баллы бүләкләр өләште, һәрберсенең күңелен күрде. Укучылар әкияти сюжетлар сәхнәләштерделәр, биеделәр, җырладылар, кызыклы уеннарда һәм конкурсларда катнаштылар, әйлән-бәйлән уйнадылар. Бәйрәм тамашасы Кыш Бабай һәм Кар кызына шигырьләр сөйләү белән тәмамланды.
Чара Алабуга шәһәренең Татарстан халыклары Ассамблеясы катнашында узды.
Татарстан халыклары Дуслык Йорты мәгълүмат үзәге