(29 февраль, 2016 ел) Татар федераль милли-мәдәни автономиясе тарафыннан оештырыла торган “ЭтноДар” фестивале быел да зурлап оештырылачак.
“ЭтноДар” – Казанда уза торган үзенчәлекле мәдәни чара. Фестиваль программасында: төбәкара яшь дизайнерлар конкурсы, этномәдәни остаханәләр циклы, семинар оештырыла. Проектның төп максаты — халык мәдәниятен, этник мирасны заманча рухта пропагандалау.
Этник мотивлар кулланып иҗат итүче яшь дизайнерлар арасында уза торган төбәкара конкурс “ЭтноДар” фестиваленең төп өлеше булып тора. Биредә 18-35 яшьтәге модельерлар, махсус уку йортларында укучы студентлар да катнаша ала. Аларның иҗатларында Россия киңлекләрендә яшәүче халыкларның этник традицияләре һәм мотивлары булу сорала.
Бу конкурс 2016 елның апрель аенда дүртенче тапкыр узачак. Проект елдан-ел профессиональ яктан да үсеш кичерә. Биредә тәкъдим ителгән коллекцияләр үзләренең яңа сулыш алып килүләре белән дә җәлеп итә.
Узган елларда оештырылган өч фестиваль дә зур уңыш белән үткән иде. Татарстан Мәдәният министрлыгы, Татарстан Президенты каршындагы мәдәниятне үстерү фонды һ.б ярдәмендә гамәлгә ашырыла торган проект чыннан да зур кызыксыну уята алды. Чараның оештыручылары белдергәнчә, быелгысы башка оешмаларны, бигрәк тә тамашачыларны күбрәк кызыксындырачак. “Без фестивальдә катнашырга теләгән һәркемгә шат булачакбыз. Әлеге проект иҗади яктан үсәргә, халык мәдәниятен заманча үстерергә ярдәм бирә”, — ди проект авторлары.