(25 сентябрь, 2016 ел) Татарстан халыклары Дуслык Йортында Татарстан Республикасыннан «Голос» телепроектында катнашкан башкаручылар турындагы «Право на голос» документаль фильмның премьерасы үтте.
Фильмда эксперт булып РСФСР халык артисты Ренат Ибраһимов чыгыш ясады. Фильмны төшерүчеләрдән кала чарада «Голос. Дети» проектының 2 сезоны катнашучысы Рената Таҗетдинова да бар иде. Тамашачылар кунакларның барысы белән дә аралаша һәм аларга кызыксындырган сорауларын бирә алды.
Тамашачыларның игътибарын аеруча да шушы ук чарада күрсәтелгән «Тайна казанского золота» фильмы җәлеп итте. Аның сюжетына 1918 елда булган Гражданнар сугышы вакыйгалары салынган. Әлеге фильмны караганнан соң тамашачылар һәм кунаклар үзара фикер алышуны дәвам иттеләр. Ике фильмның да режиссеры булган Энвера Габдрахманова сүзләренчә, «Право на голос»ның әле дәвамы да булачак: проектта жюри әгъзаларының берсе булган Дима Билан белән интервью яздырылачак.
Тиздән әлеге фильмны тамашачылар Татарстан халыклары Ассамблеясы һәм Дуслык Йорты Порталында күрә алачак.
Татарстан халыклары Дуслык Йорты мәгълүмат үзәге