(7 октябрь 2019) Татарстанның Халыклар дуслыгы йортының «Алтын» хореография мәктәп-студиясе «Казан бизәкләре» («Казанские узоры») халыкара балалар һәм яшьүсмерләр иҗаты фестивале-конкурсының төп бүләгенә лаек булды. Чара «Әкият» Татар дәүләт балалар курчак театрында узды.
Жюри «Алтын» бию коллективына «Хореография, халык биюе» номинациясендә I дәрәҗәдәге Лауреат исемен бирде һәм «Казан бизәкләре» фестиваленең Гран-при бүләген тапшырды.
Фестиваль-конкурста Пермь, Уфа, Сведлау өлкәсе һәм Казаннан коллективлар һәм аерым башкаручылар катнашты.
«Казан бизәкләре» фестиваль-конкурсы «Мин булдырам!» («Я могу!») мәдәни-белем бирү проекты кысаларында үтә. Әлеге проект – вокал, инструменталь башкару, хореография, театр, цирк, рәсем һәм декоратив-гамәли сәнгать кебек төрле өлкәләрдә талантлы балаларны һәм яшьүсмерләрне барлау һәм бүләкләүгә юнәлдерелгән балалар һәм яшьүсмерләр уңышлары халыкара фестиваль-конкурслары циклы.
Проектның миссиясе – сәләтле балалар һәм яшьүсмерләргә үз-үзләренә ышанычны арттырыга һәм, «Мин булдырам!» дип горурланып әйтеп, яраткан иҗат эшләрендә удышларга ирешергә булышу.
Профессиональ жюри составына Россиянең әйдәп баручы югары уку йортлары педагог-практиклары, доцент һәм профессорлары, иҗади коллектив һәм студияләр җитәкчеләре, Россиянең атказанган һәм халык артистлары, танылган актерлар, режессерлар, җырчылар, композиторлар, атказанган мәдәният, сәнгать, фән һәм мәгариф хезмәткәрләре керә.
Проектны оештыручы – «Мин булдырам!» иҗат берләшмәсе (Санкт-Петербург).
Проектның мәгълүмати партнеры — Татарстан Республикасы Мәдәният министрлыгы.
Татарстанның Халыклар дуслыгы йортының «Алтын» хореография мәктәп-студиясе сәнгать җитәкчесе — ТР атказанган артисты Гөлнара Гыймаева.
Дуслык йортының мәгълүмат үзәге