(10 сентябрь 2019) Татарстанның Халыклар дуслыгы йорты составына Гражданнар инициативалары үзәге вәкилләре кергән АКШ делегациясен кабул итте. Белгечләр җирле милли-мәдәни автономияләрнең миграция һәм мигрантлар адаптациясе өлкәсендә алып барган эшләре белән таныштылар. (ФОТО)
Дуслык йортына килгәнче, кунаклар республиканың Тәтеш районында булганнар, 8 нче сентябрьдә узган ТР Дәүләт Советына сайлау барышында райондагы сайлау участоклары белән танышканнар.
Татарстан тәҗрибәсе белән кунакларны Татарстанның Халыклар дуслыгы йорты директоры Ирек Шәрипов, Татарстан халыклары Ассамблеясе Советы башкарма комитеты җитәкчесе Николай Владимиров һәм Яшьләр Ассамблеясе рәисе Тимур Кадыйров таныштырды.
Очрашу барышында кунаклар шулай ук үзбәк, таджик, төрекмән, кыргыз, чуаш, удмурт автономияләре, рус милли-мәдәни берләшмәсе һәм Татарстан белән Һиндстан арасындагы мәдәни элемтәне үстерү үзәге җитәкчеләре һәм активы белән аралаштылар.
Гражданнар иницативалары үзәге вәкилләре Татарстан халыклары Ассамблеясе һәм Дуслык йорты эшчәнлеген югары бәяләделәр. Аерым алганда, алар Татарстанда чынга ашырылучы кайбер механизмнарның АКШта булмавын әйттеләр.
Дуслык йортының мәгълүмат үзәге