(19 ноябрь, 2015 ел) Н.Г. Җиһанов исемендәге Казан дәүләт консерваториясендә бик үзенчәлекле кандидатлык диссертациясе якланган. Тарихта беренче тапкыр татар гармунына багышланган фәнни эш тәкъдим ителгән.
Әлеге диссертациянең темасы: «Казан татарлары традицион мәдәниятендә гармун». Вакыйганың мөһимлеге шулай ук авторның нинди шәхес булуыннан да гыйбәрәт. Пол Уолтер Куйвинен — Америка кешесе. Татар телен махсус өйрәнеп, Арча, Әтнә, Балтач һәм Биектау районнарына экспедицияләргә чыгып йөргән. Халык гармуннарының 7 төрен дә үзләштереп, П.Куйвинен көйләрне нотага төшерү һәм уйнарга өйрәтү юнәлешләрендә яңа ысулларын уйлап тапкан. Официаль оппонентларның берсе — Каюмова Эльмира Ринат кызы (сәнгать фәннәре кандидаты, Республика традицион мәдәниятне үстерү үзәге әйдәп баручы фәнни хезмәткәре) билгеләнгән булган. Аның тарафыннан әлеге диссертация югары бәяләнгән.
Мәгълүмат http://tatar-congress.org сайтыннан алынды