Әрмән биюе — бу темпераментлы халыкның характерын күрсәтүче тамаша. Әрмән халык биюе коллектив, группа, дуэт һәм солога бүленә.
Туры эфирда Анаит Хачатурян «Нор пар» дип аталган соло хатын-кызлар биюенең база хәрәкәтләрен күрсәтте, аңа хас үзенчәлекләр белән таныштырды: грация, куллар белән бик салмак һәм нәфис хәрәкәтләр.
Чынлыкта, әрмәннәрнең бию сәнгате күпкырлы, аның күп төрләре билгеле. Аларның барысы да халык юморы һәм билгеле бер темперамент белән аерылып торалар.
Әрмән киемнәре турында аерым әйтеп үтү кирәк. Алар бер берсеннән территориаль билгеләр белән аерылалар, шулай ук төс һәм бизәкләр дә төрле. Төсләргә килгәндә, мисалга, ак – сафлык, зәңгәр – гаделлек, кызыл – батырлык һәм каһарманлыкны аңлата.
Исегезгә төшерәбез, Татарстанның Халыклар дуслыгы йорты бию коллективлары һәр атна онлайн мастер-класслар оештыралар. Видеоязмалар Вконтакте һәм Интсаграмдагы группаларга эленә.
Дуслык йортының мәгълүмат үзәге