(1 октябрь 2019) «Йортыбыз — Татарстан» республикакүләм этномәдәни фестиваленең сайлап алу турлары башланды. Апаста узган беренче сайлап алу турында 30дан артык коллектив һәм аерым башкаручы катнашты.
Үз талантларын һәм осталыкларын Татарстанның Тәтеш, Чүпрәле, Апас, Кайбыч, буа, Кама Тамагы һәм Югары Ослан районы артистлары күрсәтте. Аларның күбесе татар, рус, чуаш һәм мордва кебек Идел буе халыклары мәдәниятен тәкъдим итте.
Сайлап алу комиссиясе составына быел фестивальнең Гала-концерты режиссеры Халисә Исмәгыйлева, Республика традицион мәдәниятне үстерү үзәгенең бүлек мөдире Нәфисә Сәгъбиева һәм ТР халык артисты Таһир Латыйфуллин кертелде. Алар барлык иҗади чыгышларны да карады. Иң әйбәт дип табылганнары 4 ноябрьдә, Халыклар бердәмлеге көнендә М.Җәлил исемендәге Татар академия дәүләт опера һәм балет театрында узачак фестивальнең Гала-концертында катнашачак.
Алга таба тагын 6 сайлап алу туры үтәсе бар: Арча, Нурлат, Казан, Менделеевск, Лениногорск һәм Мөслим.
Дуслык йортының мәгълүмат үзәге