(7 август 2019) Республика буенча баручы гастроль тур кысаларында Татарстан халыклары Ассамблеясе һәм Халыклар дуслыгы йорты коллективларының өченче концерты Сабир Өметбаев исемендәге Минзәлә Дәүләт Татар драма театрында узды.
Тамашачыларны Минзәлә районы Башкарма комитеты җитәкчесе урынбасары Нэля Бикеева сәламләде. Ул районда 13 милләт вәкиле яшәве,аларның җидесе җирле милли-мәдәни автономиягә берләшүе, биредә Татарстан халыклары Ассамблеясе вәкиллеге эшләп килүе турында әйтеп үтте.
«Татарстан халыклары Ассамблеясе һәм Халыклар дуслыгы йорты коллективлары районнарга чыгып, тәҗрибәләре белән уртаклашуы безнең өчен бик мөһим», — дип сөйләде Нэля Бикеева.
Казан кунаклары таджик һәм һинд биюләре, керәшен һәм татар җырлары башкардылар, «Мирас» ансамбле Идел буе халыклары көйләрен тәкъдим итте. Җирле үзешчәннәр дә үз осталыкларын күрсәтте.
Халыклар дуслыгы йортының мәгълүмат үзәге