(8 август 2019) Апас районының Мәдәният йортында Татарстан халыклары Ассамблеясе һәм Халыклар дуслыгы йорты коллективлары чыгыш ясады. Концерт гастроль тур кысаларында узды. (ФОТО)
Тамашачыларны Татарстанның Халыклар дуслыгы йорты директоры, ТР Дәүләт Советы депутаты Ирек Шәрипов сәламләде. Ул республикадагы милли сәясәт турында һәм Ассамблеянең андагы роле турында сөйләде. Шулай ук 8 сентябрь көнне Дәүләт Советы депутатларын сайладу катнашырга өндәде.
«Республикабызда 173 милләт вәкиле бик тату яши. Бу саннан куркырга кирәкми, чөнки һәр милләт кешесе өчен Татарстанда уңайлы шартлар тудырылган. Киләчәктә дә тормышыбыз тыныч булсын», — дип сөйләде Ирек Шәрипов.
Казан коллективлары апаслыларга һинд биюе, керәшен һәм татар җырлары бүләк иттеләр. Алар белән беррәттән сәхнәдә район артистлары да чыгыш ясады.
Халыклар дуслыгы йортының мәгълүмат үзәге