(10 июнь 2020) 12 июнь Россия көне уңаеннан Татарстан халыклары Ассамблеясе һәм Халыклар дуслыгы йортының Ютуб-каналында «Мирас» ансамбле юбилеена багышланган күпмилләтле концерт видеотасмасының премьера трансляциясе булачак.
Концерт блоклары аерым чыгышлар һәм эре күпжанрлы тасмалардан тора. Иҗади чыгышлар рус, татар, Идел буе халыклары, әрмән, әзербайҗан, төрекмән һәм башка халыклар мәдәниятен чагылдыра.
Программада ТР Дәүләт фольклор музыка ансамбле, РФ Атказанган артисты, ТР Халык артисты Айдар Фәйзрахманов, ТР Халык артисты Фердинанд Сәләхов, ТР Атказанган артисты Филүс Каһиров, ТР Атказанган мәдәният хезмәткәре Светлана Измайлова, шулай ук халыкара конкурслар лауреатлары Рәфинә Ганиуллина, Рөстәм Исаев, Аршак Алтунян, Дажгын Ибрагимхалилов, Даянч Чарыев, Елена Макарова, Булат Хисматов, Эльмира Гыйлфанова, Рафил Җәләлиев катнаша.
Тамашачылар гомуммилли мәдәни кыйммәтләрне тоемлый, үзләрен күпмилләтле Россиянең бер өлеше итеп хис итәчәк.
Онлайн трансляцияне 12 июнь көнне 18:00 сәгатьтә Татарстан халыклары Ассамблеясе һәм Халыклар дуслыгы йортының Ютуб-каналында карый аласыз.
Дуслык йортының мәгълүмат үзәге