(20 ноябрь, 2016 ел) Казахстанның Астана шәһәрендәге бер урамга Казанның соңгы ханбикәсе хөрмәтенә Сөембикә дип исем куштылар. Бу хакта Казахстанның татар һәм башкортлар ассоциациясе медиаүзәге хәбәр итә.
Әлегәчә бу урамның проект атамасы — N 602 иде, яңа урамга Сөембикә исемен кушу турында карар сентябрь аенда кабул ителгән. Аңа кадәр ике ел дәвамында, 2016 елның июленә кадәр, илдә объектларга, административ- территориаль берәмлекләргә исем бирү яки аларның исемен үзгәртү сорауларын тикшерүгә моратий гамәлдә булган.
Астана акиматына 2015 ел башында кертелгән тәкъдимнәр, шул исәптән N 602 урамына ханбикә Сөембикә исемен бирү мөрәҗәгате дә быел сентябрьдә каралган, дип хәбәр итә акиматның матбугат хезмәте.