(15 декабрь 2020) Татарстан халыклары Ассамблеясы Советы Рәисе урынбасары, Татарстанның Халыклар дуслыгы йорты директоры Ирек Шәрипов Россия, Казахстан, Кыргызстан, Үзбәкстан Дуслык йортларының уртак проектларын эшләү мәсьәләсе буенча семинар-киңәшмәдә катнашты.
Чара zoom мәйданчыгында узды һәм анда мәдәниятара диалогны үстерүнең һәм милли бердәмлекне ныгытуның нәтиҗәле инструментлары буларак уртак проектлар вариантлары турында фикер алыштылар. Аерым алганда, катнашучылар Россия һәм Татарстан халыклары Ассамблеясенең төрле илләрдә хезмәттәшлеге ярдәмендә «халык дипломатиясен» булдыру кирәклеге турында сөйләштеләр. Шулай ук милли-мәдәни мохтариятләр эшчәнлеге өчен ресурс үзәкләренең мондый бәйләнешләрне җайга салуда роле билгеләп үтелде.
Ирек Шәрипов конференция барышында билгеләп үткәнчә, бүгенге көндә Татарстан халыклары Ассамблеясе һәм Дуслык Йорты Казанда урнашкан Казахстан, Үзбәкстан, Беларусь, Төркия дипломатик вәкиллекләре белән актив эш алып бара. Әлеге эш форматы ике яклы элемтәләрне җайга салу өчен зур перспективаларга ия, дип билгеләп үтте ул.
Дуслык йортының мәгълүмат үзәге