(13 февраль) Якын киләчәктә тагын ике төркем качаклар килүе көтелә. Республикада Украинадан килгән качакларны каршы алып урнаштыру өчен әзерлек эшләре даими рәвештә алып барыла. Моннан алда килгән качаклар Яр Чаллы шәһәрендә вакытлыча яшәү өчен барлык мөмкинлекләре дә булган тору урыннары белән тәэмин ителделәр Татарстан буенча Федераль миграция хезмәте идарәсеннән алынган мәгълүматларга караганда, 2014 елның декабренә Республикада Украинадан күчеп килгән 4,5 мең кеше теркәлгән иде. Соңгы вакытларда тагын да көчәеп киткән хәрби конфликт нәтиҗәсендә Россиягә килүче качаклар саны тагын да арта төшкән. Ведомство башлыгы Сергей Чепуштан сүзләренә караганда, бүгенге көндә бу сан 6 меңнән күбрәк кешене тәшкил итә.