(10 март 2021) Чистай шәһәренең «Восток» мәдәният йортында Татарстан халыклары Ассамблеясе һәм Дуслык Йорты тарафыннан оештырылган «Мы вместе!» — «Без бергә!» күчмә мәдәни фестиваль үтте.
Сәламләү сүзе белән Татарстан халыклары Ассамблеясе Советы башкарма комитеты җитәкчесе Константин Яковлев һәм Татарстанның Халыклар дуслыгы йорты директоры Ирек Шәрипов чыгыш ясады.
Татарстан халыклары Ассамблеясе һәм Дуслык йорты артистлары тамашачыларга республика территориясендә яшәүче халыкларның җырларын һәм биюләрен тәкъдим иттеләр. Фестивальнең визит карточкасы буларак күп кенә музыкаль фестивальләрдә катнашучы «Мирас» ансамбле, шулай ук Конго шәһәрендә туып-үскән, дүрт телдә, шул исәптән татар телендә җырлар башкаручы Оливер Мукенди булдылар.
«Мы вместе!» — «Без бергә!» мәдәни-агарту проекты Татарстан халыклары Ассамблеясе һәм Дуслык Йорты тарафыннан Туган телләр һәм халыклар бердәмлеге елы кысаларында гамәлгә ашырыла. Проект күчмә фестиваль форматында оештырыла, анда тамашачы Татарстан Республикасы территориясендә яшәүче халыкларның мәдәнияте белән таныша. Проектның максаты — гражданлык үзаңын һәм җаваплылыгын, патриотизмны формалаштыру, кешеләрдә гражданнарның намусын һәм милли абруен, традицион Россия рухи-әхлакый кыйммәтләрен хөрмәт итүгә нигезләнгән милләтара аралашу культурасын тәрбияләү.
Күчмә фестиваль кысаларында концертлар Татарстан Республикасының унҗиде муниципаль берәмлегендә узачак.
Дуслык йортының мәгълүмат үзәге