(30 сентябрь 2019) Казанда төрле халыкларның мәдәни гореф-гадәтләре һәм киемнәренә багышланган «Окно» мода, дизайн һәм урам перфомансы фестивале һәм «Ай да костюм» шоу-тамашасы узды. (ФОТО)
Шоу-тамаша кысаларында Татарстанның Халыклар дуслыгы йортының «Алтын» бию ансамбле (сәнгать җитәкчесе — ТР халык артисты Гөлнара Гыймаева) «Северная сюита» композициясен башкарды.
Фестиваль барышында оештырылган конкурста ТР таджиклары милли-мәдәни автономиясенең яшьләр бүлеге лидеры Зариф Мирзозариф һәм «Алтын» коллективы вәкиле Риналь Гарифуллин «Театр национальной кухни» ресторан комплексының сертификатына ия булдылар.
Аерым мәйданчыкларда фестиваль кунаклары өчен тәм-томнар, сувенир продукциясе һәм халык сәнгате эшләнмәләре тәкъдим ителде.
«Большой хоровод вокруг земного шара» театраль тамаша һәм шәһәрнең яңа гастрономик символы булган «Казан» хәләл торты белән массакүләм чәй эчү фестивальнең кульминацион өлеше булды.
Чараны Казан шәһәренең Башкарма комитеты оештырды.
Дуслык йортының мәгълүмат үзәге