(27 сентябрь 2019) Татарстанның Халыклар дуслыгы йортында «HERITAGE» милли кием конкурсы курчаклары күргәзмәсе ачылды. Анда Татарстан һәм Россиянең башка төбәкләре осталары эшләре тәкъдим ителгән.
Әлеге күргәзмә белән беррәттән Казанда «Бакый Урманчы» фильмы күрсәтеләчәк һәм «Татарстан. Бергә яшәү сәнгате» авторлык күргәзмәсе ачылачак. Дуслык йортында тәкъдим ителгән барлык эшләр дә конкурста катнаша, аларның авторлары – профессиональ дизайнерлар һәм һәвәскәрләр.
Татарстанның Халыклар дуслыгы йорты директоры урынбасары Наталья Мясникова күргәзмә ачылышында, милли киемне тәкъдим итү Дуслык йортының төп эш юнәлешләренең берсе, дип атады. Ул конкурста катнашучыларга уңышлар теләде һәм киләсе хезмәттәшлеккә ышанычын белдерде.
Конкурсның жюри әгъзасы, танылган дизайнер Катя Борисова, милли кием халык белән бергә яши һәм үсә, дип сөйләде.
«Ул (милли кием — ред.) яши, ул һәрвакыт кызыксыну уята. Дөньядагы 99,9 процент дизайнерлар, кайда эшләүләренә карамастан, теге яки бу этностан идеяләр алалар. Чөнки этнос — һәрвакыт идеяләр биреп торучы тулаем җанлы структура», — дип әйтте ул.
Күргәзмә Татарстанның Халыклар дуслыгы йортында 29 сентябрьгә кадәр эшләячәк. Керү ирекле.
Дуслык йортының мәгълүмат үзәге