Татарстан Дәүләт Советы депутаты, Татарстан халыкларының “Дуслык Йорты” директоры Ирек Шәрипов башлангычы белән Татарстан халыклары Ассамблеясы, Дуслык Йорты һәм Актаныш, Минзәлә, Мөслим районнары хакимияте башлыклары “Дуслык турында рәсем” дип исемләнгән балалар рәсемнәре бәйгесе игълан итте. Бәйге 2014 елның 24 ноябреннән 14 декабренә кадәр “Беренче сыйныф укучыларының мәдәни көндәлеге” Республика проекты кысаларында уздырыла. Аның төп максаты – балаларда Татарстандагы уникаль мәдәни төрлелекне һәм үзара аңлашуны, туган җирдә гасырлар дәвамында барлыкка килгән бердәмлекне саклау һәм ныгыту, милләтара килешү, толерантлык һәм Республикада яшәүче барлык халыкларның мәдәни-тарихи традицияләренә хөрмәт тәрбияләү.
Жюри составына Татарстан Республикасы рәссамнар берлеге әгъзалары, әлеге районнарның мәгариф бүлеге җитәкчеләре, районнардагы сәнгать мәктәбе директорлары һәм башкалар керә.
“Дуслык Йорты”, һәр районнан иң яхшы дип аталган 12 рәсемне сайлап алып, 2015 елга стена календаре чыгарырга планлаштыра. Календарьлар, һичшиксез, балаларның үзләренә дә бүләк ителә. Яхшы дип аталган рәсемнәрдән “Дуслык Йорты” күргәзмә оештырырга ниятли. Бәйгедә җиңгән балалар барысы да Татарстан халыклары Ассамблеясы һәм Дуслык Йортының Мактау хаты белән бүләкләнәчәк.