Татарстанның Халыклар дуслыгы йорты һәм республиканың татар телле «Ялкын» журналы Татарстан территориясендә яшәүче халыкларга багышланган яңа проектны башлап җибәрде.
Максаты – республика халыклары киемнәре аксессуарларын популярлаштыру һәм аларны заманча яшьләр модасына кертү.
Проект кысаларында журнал студиясендә беренче фото һәм видео төшерү эшләре үтте. Тәүге видео чыгарылыш һәм журнал битләрендә мәгълүмати язма удмурт мәдәниятенә багышланачак. Стилист Галия Сафина, алдан заманча база кием-салым компектлары әзерләп, аларны удмурт мәдәнияте «ноталары» белән тулыландырды.
Проект өчен милли аксесуарларны Татарстан удмуртларының милли-мәдәни автономиясе вәкилләре бирде. Бу монисто, алкалар, чәч өчен бизәгечләр, пута, алъяпкыч һәм башкалар.
Моннан тыш, алга таба проект кысаларында, җыелган образларны кулланып, фешн-күрсәтү оештыру планлаштырыла.
Проектны чынга ашыру буенча яңалыкларны Ассамблея һәм Халыклар дуслыгы йорты Порталы һәм «Ялкын» журналы сайтыннан күзәтегез.
Дуслык йортының мәгълүмат үзәге