БДБ рәссамнарының һөнәри берлегенең Казан бүлегенә 20 ел тулу уңаеннан Татарстанның Халыклар дуслыгы йортында «Вакыт елгасы. Без Татарстаннан» халыкара рәсем һәм графика күргәзмәсе ачылды.
Күргәзмәдә ТР халык рәссамнары Рушан Шәмсетдинов һәм Фиринат Халиков, ТР атказанган сәнгать эшлеклесе Закир Батраев, БДБ рәссамнарының һөнәри берлегенең Казан бүлеге рәисе Лада Аюдаг кебек танылган авторларның һәм башка рәссамнарның дистәләгән эшләре тәкъдим ителгән.
Казан, республиканың танылган шәхесләре, Татарстан халкы бердәмлеге, Идел буе киңлекләре, татар авыллары күренешләре — шушы һәм башка темаларны чагылдырган рәсемнәрне күрә алды ачылышка килгән кунаклар.
Күргәзмәне ТР Язучылар берлеге тарафыннан ел саен үткәрелә торган халыкара Кутуй-фест кысаларындагы «Простор» балалар һәм яшүсмерләр туризмы һәм экскурсияләре йорты рәсем студиясенең балалар рәсемнәре экспозициясе эшләре дә тулыландырды.
Дуслык йортының мәгълүмат үзәге