Татарстанның Халыклар дуслыгы йортында Казанның Күпмилләтле якшәмбе мәктәбе укучылары һәм Дуслык йорты хезмәткәрләре балалары өчен «Дракоша һәм аның дуслары!» дип исемләнгән яңа ел тамашасы узды. (ФОТО)
Оештыручылар нәни тамашачылар һәм аларның әти-әниләре өчен күңелле бәйрәм атмосферасын булдырырга тырышты. Дракоша һәм аның дуслары турындагы әкият дуслык һәм авыр чакта ярдәм итү мөһимлеге турында гыйбрәтле сюжет булды.
Тамашаның төп геройлары Убырлы сихерләгән Кар кызын коткару өчен куркыныч сәяхәткә китте. Нәни тамашачыларның ярдәме белән әкият геройлары юлларында барлыкка килгән төрле биремнәрне үти һәм авырлыкларны җиңә алды.
Әкият геройлары рольләрен Күпмилләтле якшәмбе мәктәбе һәм Халыклар дуслыгы йорты хезмәткәрләре башкарды.
Тамаша ахырында балалар Кыш бабай һәм Кар кызыннан тәмле бүләкләр алды.
Дуслык йортныың мәгълүмат үзәге