Татарстанның Халыклар дуслыгы йортында «Дуслык һәм татулык дәресләре» проектының язгы сезоны старт алды. Беренче дәрес Казанның Вахитов һәм Идел буе районнары мәктәпләренең җиденче сыйныф укучылар өчен үтте. (ФОТО)
Бу дәрес Сталинград сугышында Җиңүнең 80 еллыгына багышланган иде. Укучыларга төрле милләттән булган сугыш геройлары турында сөйләделәр һәм Бөек Ватан сугышы чорындагы төрле халыкларның телләрендә агитматериаллар күргәзмәсен тәкъдим иттеләр.
Алга таба дәреснең интерактив өлеше узды. Балалар милләтара мөнәсәбәтләр темасына багышланган кыска метражлы фильмнар карадылар, соңыннан төсле карточкалар ярдәмендә һәм телдән дә дәресне алып баручының сорауларына җавап бирделәр. Иң актив укучылар Халыклар дуслыгы йортыннан бүләкләр алдылар.
Чара Ассамблея һәм Дуслык йортының иҗад коллективлары катнашындагы күпмилләтле концерт программасы белән тәмамланды.
Дуслык йортының мәгълүмат үзәге