Татарстанның Халыклар дуслыгы йортында автор-башкаручы, Россия Язучылар берлеге әгъзасы, Татарстанның атказанган артисты Флора Вафинаның авторлык концерты узды.
Гыйнвар ахырында концерт кую – артистның күптәнге гадәте. Бу аның туган көне белән генә түгел, ә нәкъ менә кыш көнне ул вакытта яшәгән һәм эшләгән Чиләбедә узган «Арт-старт-92» яшь копмозиторлар конкурсы лауреаты булуы белән дә бәйле. Бу конкурс аның иҗади эшчәнлегенең үзенчәлекле башлангычы булып тора.
«Сәхнәдән мин бер гади булган фикерне җиткерәсем килде – дөнья белән мәхәббәт идарә итә. Үзеңә, кешеләргә, Туган якка карата мәхәббәт», — дип башлады концертны Флора ханым. Программа тулаем шул темага багышланган иде.
Ул үзе концертны алып барды, авторлык җырларын һәм романслар башкарды. Шулай ук тамашачылар белән сөйләште, аларга сораулар бирде, үз тормышыннан вакыйгалар белән бүлеште. Җавап итеп залда утыручылар сәхнәгә чыгып, артистка рәхмәтләрен белдерделәр, чәчәк бәйләмнәре бүләк иттеләр.
Дуслык йортының мәгълүмат үзәге