Шушы көннәрдә Татарстанның Халыклар дуслыгы йортына Үзбәкстан Республикасы һәм Карелия Республикасыннан кунаклар килде. Экскурсия барышында алар Ассамблея һәм Дуслык йорты, милли-мәдәни оешмалар эшчәнлеге белән таныштылар.
Үзбәкстанның Андижан дәүләт медицина институты вәкилләрен Татарстан үзбәкләренең милли-мәдәни автономиясе рәисе Абдуманоб Абдусатаров озата йөрде. Кунаклар Үзбәкстанның Казандагы Генераль консулы Фәриддин Насриев һәм Казандагы ватандашлары белән дә очраштылар, туган телне саклау, мәгариф, миграция сәясәте турында фикер алыштылар.
Карелиялеләрне – Петрозаводск шәһәр округы Хакимиятенең Иҗтимагый элемтәләр идарәсе начальнигы Жанна Малеева һәм «Взаимодействие» АНО директоры Анна Шлибурене – Дуслык йорты директоры урынбасары Наталья Мясникова каршы алды. Кунаклар Казанга Г.Р. Державин исемендәге Лаеш төбәге музее белән танышу максатыннан килгәннәр. Дуслык йортында алар аеруча да Күпмилләтле якшәмбе мәктәбе эшчәнлеге белән кызыксындылар.
Дуслык йортының мәгълүмат үзәге