Татарстанның Халыклар дуслыгы йортында «Россияне яратам» күргәзмәсен ачу тантанасы узды. Ул 12 июнь көнне билгеләп үтелә торган Россия көненә багышланган иде. (ФОТО)
Күргәзмәдә Казан шәһәренең 5 номерлы Балалар сәнгать мәктәбе укучылары эшләре тәкъдим ителгән. Үз рәсемнәрендә балалар туган яклары, анда яшәүче халыклар, аларның мәдәниятләре һәм гореф-гадәтләре белән бәйле күренешләрне сурәтләгәннәр.
Сәламләү сүзе белән Татарстан халыклары Ассамблеясы Советының башкарма комитеты җитәкчесе Константин Яковлев чыгыш ясады. Ул балаларда иҗат осталыгы белән беррәттән туган якларына мәхәббәт тәрбияләүче остазларга рәхмәтен белдерде.
«Киләчәктә нинди генә белгечлек яки профессияне сайлавыгызга карамастан, уңышлар телим сезгә», — дип мөрәҗәгать итте ул балаларга.
Экспозицияне 23 июньгә кадәр килеп күрергә мөмкин. Керү ирекле.
Дуслык йортының мәгълүмат үзәге