6 майда Татарстанның Халыклар дуслыгы йортында төрле милләттән булган Советлар Союзы Геройлары турында сөйләүче СССР халыклары телләрендәге листовкалар күргәзмәсе ачыла.
Экспозициянең нигезенә 1943-1944 еллардагы Эшче Крестьян Кызыл Армиясенең Баш сәяси идарәсенең Бөек Ватан сугышы фронтларында төрле милләт сугышчылары арасында таралган листовкалар репринтлары салынган. Бу геройлар арасында татар Илдар Маннанов, үзбәк Камал Пулатов, төркмән Адагды Таһиров, грузин Чичико Бенделиани, казах Солтан Баймагамбәтов, әрмән Гукас Мадоян, азәрбайҗан Гафур Мамедов, кыргыз Дуйшенкул Шопоков һ.б. бар.
Ачылу тантанасы 14:00 сәгатьтә Татарстанның Халыклар дуслыгы йортының тантаналар залында узачак. Керү ирекле.
Дуслык йортының мәгълүмат үзәге