Татарстанның Халыклар дуслыгы йортында Төрекмәнстан Республикасының атказанган сәнгать эшлеклесе, Төрекмәнстан Республикасы Рәссамнар берлеге әгъзасы Камил Вәлиәхмәтовның «Пленэр нурлары» күргәзмәсен ачу тантанасы узды. (ФОТО)
Күргәзмә ачылышына Сәидә Мөхәммәтҗанова һәм Марсель Вагыйзов, «Мирас» инструменталь ансамбле чыгыш ясады.
Сәламләү сүзе белән чыгыш ясап, Татарстан Республикасы мәдәният министры урынбасары Дамир Натфуллин күргәзмәнең Татарстан һәм Төрекмәнстан арасындагы ике яклы элемтәләрне ныгытуда тагын бер мөһим этап булуын билгеләп үтте.
Дамир Натфуллин 2008 елда ук Татарстан белән Төркмәнстан арасында хезмәттәшлек турында килешү имзалануын, бу ике республика халыклары арасында дустанә мөнәсәбәтләрне үстерүдә яңа этәргеч булуын искә алды. Моннан тыш, ул әлеге күргәзмә Татарстан һәм Төркмәнстан халыкларының тарихы, географиясе, мәдәнияте һәм гореф-гадәтләре белән якыннанрак танышырга мөмкинлек бирәчәк башка чараларга юл ачачак, дип ышаныч белдерде.
Камил Вәлиәхмәтов Бөтендөнья татар конгрессының VIII съезды кысаларында оештырылган күргәзмәне оештыруда ярдәм иткән һәркемгә рәхмәт белдерде, татар һәм төркмәннәрнең фикер һәм менталитеты охшашлыгын билгеләп үтте.
Күргәзмәне ачу тантанасында шулай ук Бөтендөнья татар конгрессы Башкарма комитеты рәисе Данис Шакиров, ТР халык рәссамы Мөдәрис Минһаҗев, Татарстанның Халыклар дуслыгы йорты директоры урынбасары Наталья Мясникова һәм ТР Иҗтимагый палатасы Рәисе урынбасары Анастасия Исаева чыгыш ясадылар.
Күргәзмә өч көн дәвам итәчәк. Керү ирекле.
Дуслык йортының мәгълүмат үзәге