«Тормыш тамчысы» Бөтенроссия акциясе 2004 елның сентябрендә Бесланда булган фаҗигале вакыйгаларга багышланган. Террорлык акты барышында берничә йөз кеше үлде, аларның күбесе балалар иде.
Акция бөтен ил буенча 11.00 сәгатьтә үтте. Ул террорчылык корбаннарын, һәлак булган хокук саклау органнары хезмәткәрләрен искә алырга, арабызда инде булмаган кешеләргә символик рәвештә су эчерергә өнди.
Казанның Күпмилләтле якшәмбе мәктәбенең милли бүлекләре укучылары касәдән уч төбенә су җыеп, чәчәкләргә сиптеләр. Аның алдыннан балаларга махсус сыйныф сәгате үткәрелде, укучылар һәм педагоглар һәлак булганнарны бер минутлык тынлык белән искә алдылар.
Акция 2018 елда Удмуртиянең «Бергә» яшьләр милли-мәдәни иҗтимагый берләшмәләре Ассоциациясендә катнашучылар инициативасы белән туды. Елдан-ел ул күбрәк катнашучыларны җәлеп итә.
Дуслык йортының мәгълүмат үзәге