Татарстанның Халыклар дуслыгы йортында «Тоталь диктант» акциясе узды. Диктантны ике мәйданчыкта казанлылар, милли-мәдәни оешмалар һәм Яшьләр Ассамблеясе вәкилләре язды. (ФОТО)
Беренче мәйданчыкта традицион текстны «ТР туризмны үстерү үзәге» АКБО генераль директоры Дилбәр Садыйкова укыды. Быелгы диктантның авторы – Владивостоктан язучы һәм журналист Василий Авченко. Ул үз текстын Ерак Көнчыгыш сәяхәтчесе, язучы, тикшеренүче Владимир Арсентьевка багышлаган.
Икенче мәйданчыкта рус телен чит тел буларак өйрәнүче чит ил студентлары TRuD тексты яздылар. Ул – гадиләштерелгән диктант текстыннан һәм рус теленнән тесттан торды. Студентларга текстны Татарстан халыклары Яшьләр Ассамблеясе рәисе Тимур Кадыйров укыды.
Катнашучылар билгеләп үткәнчә, быел текст катлаулы булып тоелмаган, әмма кайберләрендә тыныш билегләре буенча сораулар туган. Дуслык йорты мәйданчыгында иң яшь катнашучыга 13 яшь, ә иң өлкәненә – 71 яшь иде.
Акция тәмамлануга, барлык эшләрне тикшерү өчен әйдәп баручы эксперт-филологларга тапшырдылар. Экспертлар составына ТР Рус милли-мәдәни берләшмәсе әгъзалары, рус теле укытучылары, укытучылар һәм студент-филологлар керә.
Дуслык йортының мәгълүмат үзәге