Туган тел көне һәм бөек татар шагыйре Габдулла Тукайның тууына 137 ел тулу уңаеннан Татарстанның Халыклар дуслыгы йортында «Ассамблея йөзләрдә» фотокүргәзмәсе ачылды.
Күргәзмәдә Татарстан халыклары Ассамблеясе һәм Халыклар дуслыгы йортының 30 ел дәвамындагы күпкырлы эшчәнлеген, кызыклы һәм мөһим вакыйгаларын күрергә мөмкин иде. Шулай ук килгән кунаклар фотолар аша милли мәдәният, республикада яшәүче халыкларның гореф-гадәтләрен үстерү, туган телләрне саклауны максат итеп куйган республикадагы милли-мәдәни хәрәкәтнең һәм Ассамблеянең барлыкка килү чоры һәм үсү тарихы белән таныша алдылар.
Күргәзмәне ачу тантанасы кысаларында үз эченә татар һәм рус җыр һәм биюләрен алган концерт программасы да күрсәтелде. Марсель Вагыйзов һәм Марат Галимов, Күпмилләтле якшәмбе мәктәбенең татар бүлеге укучысы Алинә Садыйкова һәм «Алтын» мәктәп-студиясе чыгыш ясады.
Дуслык йортының мәгълүмат үзәге