Татарстанның Халыклар дуслыгы йортында Бөек Җиңү көненә багышланган «Безнең хәтердә» дип исемләнгән күпмилләтле концерт программасы узды.
Чарага ветераннар, махсус хәрби операциядә катнашучыларның гаиләләре вәкилләре, Ассамблея һәм Дуслык йорты, милли-мәдәни берләшмәләр җитәкчеләре чакырылган иде.
Бәйрәм Күпмилләтле якшәмбе мәктәбе, Татарстан халыклары Ассамблеясе һәм Халыклар дуслыгы йортының иҗат берләшмәләре тарафыннан әзерләнгән иде. Концерт программасын махсус кунак – Татарстан Республикасының Халык артисты Илсур Сафин ачты. Ул илебезнең күпмилләтле горурлыгы символына әверелгән «День Победы» җырын башкарды.
Залда утырган тамашачыларны Татарстан халыклары Ассамблеясе Башкарма комитеты җитәкчесе Константин Яковлев һәм Татарстанның Халыклар дуслыгы йорты директоры Ирек Шәрипов сәламләде. Алар ветераннар һәм махсус хәрбия операциядә катнашучыларга үз теләкләрен җиткерделәр.
Алга таба балалар башкаруында патриотик җырлар яңгырады. Чара Күпмилләтле якшәмбе мәктәбенең «Жемчужинки» вокаль ансамбле ансамбле башкаруындагы «Давайте, люди, добрее будем!» җыры белән тәмамланды.
Дуслык йортының мәгълүмат үзәге