Татарстанның Халыклар дуслыгы йортында, инвалидлар декадасы кысаларында, «Знакомые мотивы» дип аталган сәламәтлек мөмкинлекләре чикләнгән балалар һәм яшьләр эшләре күргәзмәсе ачылды.
Чарада катнашучыларны һәм кунакларны Дуслык йорты директоры урынбасары Наталья Мясникова сәламләде. Ул, авырлыкларга карамастан, әти-әниләре, укытучылары һәм волонтерлар белән бергәлектә бу дөньяны яхшырак һәм игелеклерәк иткән балаларның талантын һәм эшләренең төрлелеген билгеләп үтте.
«Дуслык йортында ел дәвамында 20дән артык күргәзмә ачыла. Шуларның берсе — декабрь башына туры килә. Без ул күргәзмәләрне «үзенчәлекле» дип атыйбыз. Ел саен эшчәнлегебезгә нәтиҗәләр ясаганда без, декабрьдә оештырылган күргәзмәләр аеруча да истә калалар, чөнки анда тәкъдим ителгән картиналарда үзенчәлекле энергия бар, дип әйтәбез», – дип сөйләде Наталья Мясникова.
Күргәзмәдә тәкъдим ителгән эшләрне Н.И. Фешин исемендәге Казан сәнгать училищесы каршындагы сәламәтлеге чикле балалар һәм яшьүсмерләр өчен арт-студия укучылары башкарган. Әлеге арт-студиядә студент-волонтерлар үзенчәлекле балаларга рәсем сәнгате телен үзләштерергә булышалар. Күргәзмәдә 2023 ел үчендә ясалган 30дан артык эш тәкъдим ителгән.
Күргәзмә Халыкара инвалидлар көненә багышлана. Бу дата календарьда сәламәтлек мөмкинлекләре чикләнгән кешеләр кичергән авырлыкларны искә алу гына түгел, ә аларның теләкләре, хыяллары һәм эшләре турында сөйләү өчен дә кирәк.
Дуслык йортының мәгълүмат үзәге