(13 сентябрь 2019) 2019 елның 16-18 сентябрь көннәрендә Казан шәһәрендә ХIV «Азия – Европа» Халыкара яңа музыка фестивале үтәчәк. Зур масштабтагы әлеге музыкаль вакыйга узачак мәйданчыкларның берсе Татарстанның Халыклар дуслыгы йорты булачак.
«Европа – Азия» фестивале юбилей елында үтә – Татарстан Республикасының композиторлар берлегенә 80 ел тула. Шулай ук фестиваль Татарстан Республикасы өчен мөһим булган вакыйга – Татар АССР оешуга 100 ел тулу уңаеннан оештырыла.
Австралия, Вьетнам, Голландия, Корея, Перу, Чили, Үзбәкстан, Казахстан, Кыргызстан һәм Россиянең башка регионнары композиторлары һәм музыкантлары фестивальнең кунаклары булачаклар. Чараның аерым акценты – төрле илләрнең фольклор этнографик ансамбльләре палитрасы һәм милли музыка уен коралларының үзенчәлекле яңгырашы.
Фестиваль 16 сентябрь көнне 18:30 сәгатьтә С.Сәйдәшев исемендәге Дәүләт Зур концертлар залында ачылып китәчәк. Концерт программасының төп чыгыш ясаучылары – Татарстан Республикасының Дәүләт симфоник оркестры. Оркестр Австралия, Голландия, Корея, Кыргызстан һәм Россия композиторлары әсәрләрен башкарачак.
17 сентябрь көнне Халыклар дуслыгы йорты һәм ТР композиторлар берлегендә «Европа – Азия» фестиваленең камера концертлары узачак. Тамашачылар төрле милли музыка уен коралларының кабатланмас яңгырашын һәм тамак төбе белән җырлауны ишетә алачаклар.
Фестиваль 18 сентябрь көнне 18:30 сәгатьтә С.Сәйдәшем исемендәге Дәүләт Зур концертлар залында Гала-концерт белән тәмамланачак. Чарада Халыкара конкурсның Гран-при иясе «Новая музыка» Камера оркестры чыгыш ясаячак. Оркестр Вьетнам, Үзбәкстан, Австралия, Казахстан һәм Россия композиторлары әсәрләрен башкарачак. Концертның икенче өлешендә фестиваль кунаклары – Казахстан, Үзбәкстан, Перу һәм Россия шәһәре музыкантлары – чыгыш ясаячак.
Дуслык йортының мәгълүмат үзәге