(1 апрель, 2016 ел) Татар халкының бөек шагыйре Габдулла Тукайның тууына 130 ел тулуга багышлап, “И Казан! Дәртле Казан! Моңлы Казан! Нурлы Казан!” дигән Казан күләмендә фестиваль-конкурс үткәрелә.
Фестиваль-конкурсның район этаплары түбәндәге тәртиптә уздырылачак:
— 5 , 6 апрельдә “Сәйдәш” Мәдәният үзәгендә (Н.Ершов ур. , 57а);
— 11, 12 апрельдә В.И.Ленин исемендәге Мәдәният йортында (Копылов ур., 2а);
— 13 ,14 апрельдә Мирный торак массивы Мәдәният йортында (Яңа Дәүләки ур./Ново-Давликеевская, 4а);
— 16 апрельдә “Юность” Мәдәният йортында (Химиклар ур., 11).
Җиңүчеләрне берничә юнәлеш буенча ачыклаячаклар. Шул рәвешле, катнашучылар түбәндәге 6 номинация буенча осталыкта көч сынашачаклар: “Нәфис сүз”, “Театр сәнгате”, “Хореография”, “Вокал”, “Инструменталь жанр”, “Гамәли сәнгать”. Район этаплары нәтиҗәләре буенча лауреатларны билгелиләр, аларга шәһәр күләмендәге фестиваль-конкурсның гала-концертында гран-при һәм истәлекле бүләкләр тапшырыла. Иң оста башкаручылар татар йолдызлары катнашындагы гала-концертта сәләтен күрсәтә ала. “И Казан! Дәртле Казан! Моңлы Казан! Нурлы Казан!» дигән шәһәр күләмендәге фестиваль-конкурсның гала-концерты 25 апрель көнне Иске Татар бистәсендә (җәяүлеләргә бирелгән К.Насыйри урамында) була.