(29 гыйнвар, 2017 ел) 3 февраль көнне Татарстан халыклары Дуслыгы Йортында «Алтын» хореография студия-мәктәбенә 3 ел тулу уңаеннан зур концерт оештырыла. Студия-мәктәпнең җитәкчесе — танылган хореограф Гөлнара Гыймаева.
Татарстан халыклары Дуслыгы Йорты каршындагы «Алтын» хореография студия-мәктәбендә шөгыльләнүче һәр бала өчен бию — хоббидан да мөһимрәк нәрсә.
Үз эшен ныклап ятаркан кеше генә балаларны бию сәнгатенә шулай гашыйк иттерә ала. Гөлнара Гыймаева — үз эшенең остасы һәм чын фанаты.
«Ансамбльне оештыру идеясе күптән туган иде. Ләкин бу адымны ясарга мин озак кына тәвәкәлли алмыйча йөрдем», — дип сөйли коллектив җитәкчесе.
Бер вакыйга этәрә аны: Татарстан халыклары Дуслыгы Йортындагы «Сакартвелло» грузин биюе ансамбле һәм «Оценба» кавказ биюе ансамбле җитәкчесе Тея Пертая Гөлнарага халык биюләрен өйрәтү белән шөгыльләнергә тәкъдим итә.
Беренче дәрескә бары 5 кыз бала килә: иң кечкенәсенә 5 яшь, ә иң олысына 12 яшь. Бер группада төрле яшьтәге балалар белән шөгыльләнү авыр була. 3 айдан соң коллектив 15 кешегә тула. Җитәкченең күңеле төшә.
«Бер дә бирешәсе килмәде. Шуңа күрә көчемне җыеп, балалар бакчалары, җәмәгать учреждениеләре буенча йөрдем, игълан элдем. Шулай итеп балалар килә башлады, һәм ике группа җыелды», — ди Гөлнара Гыймаева.
Бүгенге көндә «Алтын»да шөгыльләнергә теләүчеләр шундый күп, хәтта сайлап алу конкурсы оештырырга мөмкин. Коллектив шәһәр һәм республика бәйрәмнәрендә чыгыш ясап үз исемен аклады. Мисалга, Чебоксарда үткән «Радуга танца» конкурсында «Алтын» ике тапкыр беренче урынны яулады.
Хәзер ансамбльдә 4 тән һ2 яшькә кадәрге балалар бии. Алар халык-сәхнә биюләрен һәм Идел буе халыклары биюләрен башкаралар.
Ирешкән уңышларыгызның сере нидә, дигн сорауга барысы бергә: «Без тырыш, без үз эшебезнең фанатлары», дип әйтәләр. Гулнара Гыймаева — усал педагог, әмма барлык кызлар да аны бик яраталар.
Алда — яңа биюләр, яңа бию мәйданнары, яңа образ һәм костюмнар. Бер тапкыр югары сәнгатькә аяк баскан балалар биюгә карата мәхәббәтне хәрвакыт йөрәк түрләрендә саклаячаклар.
Татарстан халыклары Дуслыгы Йорты мәгълүмат үзәге