Татарстанның Халыклар дуслыгы йортында ТР прокуроры Илдус Нәфыйков һәм ТР Хезмәт, мәшгульлек һәм социаль яклау министры Эльмира Зарипова Татарстан гражданнарын бергәләп кабул иттеләр. Аларга 19 кеше мөрәҗәгать итте. (ФОТО)
Берәүләр җитәкчелек тарафыннан, яңа коронавирус инфекциясеннән вакцинация ясатмау сәбәпле, хезмәт хакын саклап калмыйча эштән читләштерелүләренә зарланды, икенчеләр яшәү урыны буенча эшкә урнашуда ярдәм сорады, өченчеләр социаль яклау турындагы закон бозылу очраклары турында сөйләде.
Берничә мөрәҗәгать суд приставларының һәм тикшерүчеләрнең процессуаль карарлары, конкрет җинаять эшләре буенча суд карарларының һ.б. нигезле булу-булмавына бәйле иде.
Халык белән очрашу нәтиҗәләре буенча барлыгы 21 язма мөрәҗәгать кабул ителде. Татарстан Прокуроры Илдус Нәфыйков мөрәҗәгать итүчеләрнең дәлилләре буенча төрле яклап тикшерү уздырырга һәм, нигез булган очракта, җавап бирү чараларын күрергә кушты. Шул ук вакытта күзәтчелек ведомствосы башлыгы аппаратның профильле бүлекчәләре җитәкчеләреннән гражданнарның хокукларын бозу очракларын бетерүгә ирешүне таләп итте.
Барлык мөрәҗәгатьләр республика прокуратурасында контрольгә алынды.