(20 май, 2016 ел) 21 майдан 17 июньгә кадәр Татарстанда “Иман моңы” V Халыкара рухани музыка фестивале узачак. Фестиваль төрле милләт вәкилләрен берләштерү, тынычлык һәм толерантлык идеяләрен алга сөрә.
Бу проект Татарстан Мәдәният министрлыгы ярдәме белән 2012 елдан башлап ел саен оештырыла. Фестиваль концертлары республикабызның туристлар күпләп килә торган җирләрендә уза: Борынгы Болгар, Зөя утравы шәһәрчеге һәм Казан Кремлендә.
Быелгысы 21 майда Болгарда исламны кабул иткән көнне, ягъни Болгар ислам академиясе нигезенә капсул калдырган вакытта старт алачак, дип хәбәр итә чараны оештыручылар. Фестивальнең концертлары республиканың иң күренекле туристлык үзәкләрендә – Борынгы Болгар шәһәрендә, Свияжск утрау-шәһәрчегендә һәм Казан Кремлендә узачак.
Болгарда узачак концертта татар эстрадасы йолдызлары: Алина Шәрипҗанова, Филүс Каһиров, Резедә Галимова, Илүсә Хуҗина, Артур Исламов, Миңгол Галиев, шулай ук «Айгөл» вокаль ансамбле, «Риваять» төрки этника һәм һөнәрчелек ансамбле катнаша. Концертны Луара Шакирҗанова, Фәнис Җиһаншин алып барачак. Программада традицион дини музыка, татар халык җырлары, хәзерге заман композиторлары әсәрләре яңгыраячак. Яшь композитор Эльмир Низамов һәм Резидә Әхиярова көйләрен дә ишетеп булачак.
Фестиваль концерты иртәнге 10.00 да Ак мәчет артындагы мәйданда узачак. Керү бушлай.
“Иман моңы”ның икенче концерты 12 июньдә Зөя утрау шәһәрчегендә узса, 17 июньдә исә – Казан Кремленең Туп сараенда. Биредә Карл Дженкинсның “Месса мира «Вооруженный человек» әсәре башкарылачак.