(5 февраль) Татарстан халыкларының Дуслык Йортында Иран Ислам Республикасының Көнчыгыш Әзербайҗан провинциясе сәнгать әһелләре катнашында бәйрәм концерты узды. Концерт Казанда Иран Ислам Республикасы мәдәнияте көннәре кысаларында оештырылды.
Әлеге мәдәни чарада Татарстан Республикасы ягыннан мәдәният министры урынбасары Гузәл Нигматуллина, Татарстан халыкларының Дуслык Йорты директоры Ирек Шәрипов, кунаклардан Иран Ислам Республикасының Казандагы генераль консулы Рәсүл Багернежад Шаян, Тебриз мэры Садег Наджафи Хезерлу җитәкчелегендә әлеге шәһәр делегациясе катнашты.
Концерт Татарстан башкаласы халкын Тебриз шәһәре мәдәнияте белән таныштыруга юнәлдерелгән иде. Бу шәһәр 4 меңнән артык еллык тарихка ия, ул Иранның иң зур һәм әһәмиятле шәһәрләренең берсе санала. Аның мәдәнияте, җырлары белән танышырга теләүчеләр Дуслык Йорты залына гына да сыймады.
«Безнең шәһәрләр үзара дустанә мөнәсәбәттә яши, ике шәһәр арасында икътисадый һәм мәдәни элемтәләр елдан-ел ныгый бара, — дип башлады үзенең сәламләү сүзен Татарстан Республикасы мәдәният министры урынбасары Гузәл Нигматуллина. — Һәр ике шәһәрнең дә Бөтендөнья ЮНЕСКО мирасына кертелгән тарихи һәйкәлләре бар. Һәр ике шәһәр үзләренең үткән тарихын күз карасыдай саклыйлар.” Министр урынбасары Иран кунакларына иминлек, тынычлык теләде һәм алга таба да ике шәһәр арасындагы дустанә мөнәсәбәтләр дәвамлы булуына ышаныч белдерде.
Көнчыгыш Әзербайҗан провинциясе сәнгать әһелләре Иран мәдәниятенең асыл үрнәкләрен күрсәттеләр. Кичә өч телдә — татар, рус һәм иран телләрендә барды.
