(10 октябрь 2018) Казанда «Йортыбыз — Татарстан» республикакүләм этномәдәни фестиваленең бишенче зона сайлап алу туры үтте. Бүгенге көн исәбе буенча фестивальдә 1400дән артыгырак кеше катнашкан, узган ел исә барлык зона турларында 1200 кеше исәпләнгән иде.
Татарстан башкаласында сайлап алу туры ике этапта узды. Иртән жюри каршында үз осталыгын һәм талантын Биектау, Яшел Үзән, Лаеш, Питрәч һәм Балык Бистәсе районнарыннан килгән иҗат коллективлары һәм аерым башкаручылар күрсәткән булса, көннең икенче яртысында Казан шәһәре һәм Татарстан халыклары Ассамблеясе һәм Халыклар дуслыгы йорты вәкилләре чыгыш ясады.
Бу турда татар, рус, чуаш, удмурт, мари, башкорт, керәшен, төрекмән, әрмән, грузин, әзербайҗан, үзбәк, казах, корея, белорус, украин, немец, дагыстан һәм казакъ халыклары мәдәниятен 110 коллектив һәм аерым башкаручы тәкъдим итте.
«Бу юлы мин үзем «Heir zeihen deine Flüsse» исемле немец телендәге җырны башкарырга булдым. Ул һәркем өчен кадерле булган нәрсә — туган як турында», — дип сөйләде ТР немецлар милли-мәдәни автономиясе җитәкчесе Виктор Диц.
Барлык катнашучылар да фестиваль дипломнары белән бүләкләнде.
Фестивальнең тагын ике зона сайлап алу туры калып бара. Алар Лениногорск һәм Сарманда узачак. Фестивальнең финалы, гадәттәгечә, Казанда 4 ноябрь Халыклар бердәмлеге көнендә узачак. Анда иң әйбәт коллективлар чыгыш ясаячак.
Халыклар дуслыгы йортының мәгълүмат үзәге