Татарстанның Халыклар дуслыгы йортында «Нәүрүз» бәйрәменә багышланган концерт программасы узды. Аны Казан шәһәренең Күпмилләтле якшәмбе мәктәбе оештырды.
Чарада мәктәпнең барлык милли бүлекләре укучылары да чыгыш ясады, барлыгы ике дистә иҗат номеры күрсәтелде. Концерт программасы сюжеты буенча, балалар Нәүрүз-бикәне коткарып, яз килүен тизләтте. Моның өчен алар бәйрәмнең символлары булган бәхет, сәламәтлек, зирәклек ачкычларын табарга тиеш иде.
«Ахырда барлык балаларны дуслык ачкычы берләштерде. Мәктәп укучылары тамашачыларны музыка уен коралларында уйнау, җыр һәм бию осталыклары һәм башка талантлары белән сөендерде. Матур һәм онытылмаслык дуслык бәйрәме булды бу», — дип сөйләде мәктәп укытучысы Татьяна Архипова.
Дуслык йортының мәгълүмат үзәге