Камал театры премьераларга багышланган лекцияләр циклын дәвам итә – “Шүрәлене көттегезме?!” спектакле премьерасы уңаеннан язучы, әдәбият белгече Галимҗан Гыйльманов Шүрәле образының эволюциясе турында сөйләячәк. Әлеге проектның максаты – тамашачыларга спектакльләрнең тарихи һәм мәдәни контекстын аңлату.
“Бу юнәлештә беренче адым Илгиз Зәйниевның “Җәүдәт берлән Зөбәрҗәт” премьерасы алдыннан тарихчы Лилия Габдрафикованың ХХ гасыр башы татар җәмгыяте турында лекциясе иде. “Җәүдәт берлән Зөбәрҗәт” пьесасын язу фәнни-тикшеренү эшләреннән башланды, миңа монда танылган тарихчы Лилия Габдрафикованың фәнни хезмәте бик ярдәм итте. Тамашачыларга шул чор турында лекция укуы өчен аңа бик рәхмәтлебез”, – ди спектакльнең авторы һәм режиссеры, Камал театрының сәнгать җитәкчесе Илгиз Зәйниев.
“Шүрәлене көттегезме?!” спектакле премьерасы кысаларында оештырылган “Шүрәле — урман хуҗасы: фольклор, фән һәм фантазия чигендә” лекциясе фольклорның заманча сәнгать һәм фән белән үзара бәйләнешен күрсәтер дип өметләнәбез”, – ди Илгиз Зәйниев.
Лекция иртәгә, 18 декабрьдә, театрның Камера залында татарча укылачак.
ТХДЙ мәгълъмат бүлеге, matbugat.ru материаллары буенча